FAIGAMOS QU’ALSA USE LA TOPONIMIA OFICIAL YÁ Y TENGA LA SO WEB N’ASTURIANU

LA CAUSA DE MARZU

Esta ye la carta qu’ha mandase a la dirección alsa@alsa.es pa reclamar l’usu del asturianu na so web y el cumplimientu nel usu de la toponimia oficial.

----

A la Dirección d’ALSA n’Asturies:

El Grupu ALSA, que tuvo’l so orixe n’Asturies y caltién llazos bien importantes con esti país, incumple la llei al nun usar la toponimia oficial asturiana, na so web, nos autobuses que circulen per asturies, paraes del bus, publicidá, etc.

Ye un casu bien importante, pues la empresa ye la concesionaria de munches llinies y polo tanto ta faciendo servicios públicos sobre los que tienen la esclusividá.

Amás, na so web ufren la posibilidá de poder lleer la información en munches llingües, toles del Estáu español, menos l’asturianu.

Reclamamos, poro, al traviés del unvíu d’esti corréu, que cumplan col usu de la toponimia oficial en tolos ámbitos y reclamaos l’usu del asturianu na so páxina web, n’igualdá de concidiciones coles demás llingües.

Munches gracies pola so atención.

Entamamos l'actividá de 12 meses 12 causes

Dende esti blogue queremos entamar una riestra de campañes al traviés de la rede, que dean visibilidá al conflictu llingüísticu n’Asturies. Camentamos qu’amás, pue consiguise que se den dalgunos pasos que de nun reclamase nun van venir solos enxamás. La normalización de la llingua asturiana, en tolos ámbitos de la sociedá, ye’l nuesu oxetivu cimeru y únicu con esti blogue.

Cada mes daremos entamu a una campaña nueva, anque les anteriores siguirán en marcha hasta consiguir los oxetivos que mos plantegamos en cada casu.

La idea ye utilizar l’unviu masivu de correos lletrónicos a la institución o organización sobre la que cinque la campaña d’esi mes.

Aguardamos la vuesa collaboración. Podéis siguinos al traviés del blogue o, si vos peta, mandanos el vuesu corréu lletrónicu a causespolasturianu@gmail.com, y dende ehí fadrémosvos llegar cada mes la campaña que correspuenda. Amás, podéis facenos llegar propuestes sobre les campañes.

El llunes 14 ponemos en marcha la primer campaña.

¡Esperamos la vuesa collaboración pa que la llingua asturiana espoxigue!